Молитва благоверному великому князю Святославу
Молитва
О, святый угодниче Христов, благоверный княже Святославе! Вемы тя, яко печальника земли Русския, кротостию своею в междоусобных распрех братий умиротворявшего. Странен и пришлец на земли явился еси, многажды бо гоним с престола княжения своего, чужд вражды и ненависти показался еси. Благородствие, богатство, честь и славу якоже суетная презрев, к Богу единому всею душею прилепился еси, и благо иго Христово на ся взем, миролюбием горняго Сиона достигл еси. Не вемы тя мертва быти, но и по смерти ведуще тя жива суща, предстояще пред цельбоносною ракою мощей твоих, сия сердцем и усты лобызаем и тебе зовем:
Призри на люте страждащее отечество наше, в немже крамолы и нестроения зело умножишася, и умоли Господа Славы да помилует землю Русскую. Пробуди совесть нашу, суетными мудрованиями и страстьми пагубными усыпленную. Просвети сердца наша, гордынею и злопамятством омраченные. Потщися, угодниче Божий, не остави нас во греховнем плену быти, да не будем посмеяние диаволу и не умрем в лукавых деяниях наших, даруй нам покаяние люботрудное. Умири вражду на нас имущих, да не погибнут ради нашего окаянства. Буди усердный попечитель о домех наших, призри на слезы отцев и матерей о чадех своих заблудших. Посети в темницах сущих, вдовиц и сирых не остави к пользе душевней и телесней потребная у Господа испроси, во еже избавитися нам всем в день судный от страшных шуия части, стати же одесную со избранными Его и наследие Царствия Небесного славити купно с тобою всех благих Подателя единого в Троице славимого Бога, Отца и Сына и Святаго Духа ныне и присно и во веки веков. Аминь.
Тропарь, глас 5
Славу земнаго княжения,/ богомудре Святославе,/ оросил еси незлобием и кротостию,/ тем же и Бог тя прослави,/ чудесы во утешение скорбящих,/ целиши бо с верою притекающих к раце мощей твоих./ Сего ради молим тя:/ проси у Христа Господа/ от всяких бед избавление/ и стяжание нам Царствия Небеснаго.
Кондак, глас 3
Града Юрьева теплейший заступниче, /земли Володимирския покрове,/ благоверный княже Святославе, /избави нас душетленных страстей,/ и спаси твоими молитвами.
Величание
Величаем тя, /святый благоверный княже Святославе,/ и чтим святую память твою, /ты бо молиши о нас/ Христа Бога нашего.
