Молитва преподобному Пимену, архимандриту Угрешскому

Тропарь, глас 2

Мона́шеское житие́ от ю́ности возлюби́в, / во оби́тель Угре́шскую всели́лся еси́, / иде́же труды́ ко трудо́м прилага́я, / мона́хов мно́жество собра́л еси́, / и́хже сердца́ согрева́я и тяготы́ нося́, / путе́м Христо́вым ше́ствовал еси́. / Пи́мене преподо́бне, // моли́ Христа́ Бо́га спасти́ся душа́м на́шим.

Кондак, глас 1

Тобо́ю, преподо́бне о́тче Пи́мене, / оби́тель Угре́шская благослове́нием Бо́жиим процве́тшая, / па́мять твою́ ны́не пра́зднует / и лику́ющи зове́т ти; / сла́ва Да́вшему тебе́ кре́пость, / сла́ва Венча́вшему тя, // сла́ва Де́йствующему тобо́ю всем исцеле́ния.

Молитва

О свяще́нная главо́, преподо́бне о́тче, преблаже́нне а́вво Пимене! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же сам упа́сл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя духо́вныя, я́ко име́яй дерзнове́ние к Небе́сному Царю́; не премолчи́ за ны́ ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных, у престо́ла Вседержи́телева, и не преста́й моля́ся о нас ко Христу́ Бо́гу; и́бо дана́ тебе́ бысть благода́ть за ны́ моли́тися. Не мни́м бо тя су́ща ме́ртва; а́ще бо те́лом и преста́вился еси́ от нас, но и по сме́рти жи́в сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся. Ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу о по́льзе душ на́ших и испроси́ нам вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чной му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Аминь.