Молитва преподобному Афанасию Сяндемскому
Тропарь, глас 8
В тебе́, о́тче, изве́стно спасе́ся е́же по о́бразу:/ прии́м бо Крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней,// те́мже и со А́нгелы сра́дуется, преподо́бне Афана́сие, дух твой.
Кондак, глас 2
Чистото́ю душе́вною боже́ственне вооружи́вся,/ и непреста́нныя моли́твы я́ко копие́ вручи́в кре́пко,/ пробо́л еси́ бесо́вская ополче́ния,/ Афана́сие, о́тче наш,// моли́ непреста́нно о всех нас.
Молитва
О преподобне и богоносне отче наш Афанасие, ангеле земный и человече небесный, изрядный угодниче Христов и Владычицы нашей Богородицы добрый чтителю, всем же с верою и любовию к тебе притекающим известный заступниче! Испроси нам вся к житию сему временному потребная и к вечному нашему спасению полезная. Пособствуй предстательством твоим, угодниче Божий, да в мире глубоце пребудет святая Церковь Христова и государство Российское во всяком благочестии и благостроении да сохранится. Сице же и всем нам, чудотворче святый, буди скорый во всякой скорби и обстоянии помощник, наипаче же в час кончины нашея явися нам, заступник благосердный, да не преданы будем на мытарствах воздушных власти злобного миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный, просиявый зарею благодати Божия, украшение сый места сего! Не престани моляся, да николиже благодать Божия и покров Богоматери от места сего не отступит, но да сподобимся вкупе с тобою и со всеми святыми в селениях райских славити величие, Благодать и милость единого в Троице Бога, Отца, Сына и Святаго Духа, во веки веков. Аминь.
Величание
Ублажа́ем тя,/ преподо́бне о́тче Афана́сие,/ и чтим святу́ю па́мять твою́,/ наста́вниче мона́хов// и собесе́дниче Ангелов.
