Молитва блаженному Августину, епископу Иппонийскому

Тропарь, глас 4

Се́рдцем всем Христу́ после́дуя, святи́телю Августи́не, / сло́вом и де́лом и́стину запечатле́л еси́ / и ересе́й злочести́вых яви́лся еси́ неле́ностный искорени́тель, / моли́ся вы́ну ко святе́й Тро́ице, // да спасе́т ду́ши на́ша.

Кондак, глас 4

Непоколеби́ме сто́лпе Це́ркви Вселе́нския / на недви́жимем ка́мени ве́ры основа́нный, / догма́т правосла́вия неле́стный учи́телю / и покая́ния велегла́сный пропове́дниче, / запечатли́телю и́стины, / прехва́льне Августи́не, // святи́телю Христо́в.

Молитва

О, пресла́вный Христо́в святи́телю, Вселе́нския Це́ркви похвало́ и учи́телю богому́дрый, правосла́вия наста́вниче и покая́ния пропове́дниче, блаже́нне Августи́не! При́зри с го́рних высо́т на нас недосто́йных, и́щущих твое́й по́мощи и милосе́рдия: умоли́ Влады́ку вся́ческих, Ему́же на земли́ всем житие́м твои́м служи́л еси́, да да́рует нам неукло́нное хране́ние неповрежде́нныя пра́выя ве́ры, ю́же от Го́спода чрез ученико́в Его прия́ли есмы́, да помо́жет запечатлева́ти ю де́лы любви́ и милосе́рдия, и да споспе́шествует нам во благи́х на́ших начина́ниях; защити́ ны от зло́бных наве́т вра́жиих и помози́ всем нам твои́м хода́тайством улучи́ти Ца́рствие Небе́сное, иде́же ты ны́не в незаходи́мей сия́еши сла́ве пред лице́м Всемилосе́рднаго Бо́га в Тро́ице покланя́емаго и сла́вимаго во вся ве́ки веко́в. Ами́нь.