Поклонение Святой Троице
Вся силы души моея, приидите поклонимся Богу, в Троице единому, Отцу и Сыну и Святому Духу!
Вся мысли сердца моего, приидите, поклонимся Троице, во Единице почитаемой!
Вся чувства тела моего, приидите, поклонимся и припадем, и восплачемся пред Господем, сотворшим нас!
Покланяются Тебе, Пресвятая, Единосущная, Животворящая и Неразделимая Троице, Отче, Сыне и Святый Душе, верую в Тя и исповедую, славлю, благодарю, хвалю, почитаю, превозношу Тя и молю: помилуй мя, непотребнаго раба Твоего! (Трижды).
Покланяюся Тебе, Боже Отче, яко от небытия в бытие привел мя еси, образом Твоим Божественным украсил мя еси!
Покланяюся Тебе, Боже Сыне, яко честною Твоею Кровию стяжал мя еси, от законныя клятвы искупил мя еси, Крещением Святым просветил мя еси!
Покланяюся Тебе, Боже Душе Святый, яко оживил мя еси, вразумил мя еси, светом веры облистал мя еси!
Покланяюся Тебе, Боже Отче, яко дал ми еси душу Божественным и животворящим Твоим вдохновением!
Покланяюся Тебе, Боже Сыне, яко душу Твою за мя на Кресте положил еси!
Покланяюся Тебе, Боже Душе Святый, яко избавляеши душу мою от смерти, очи мои от слез и нозе мои от поползновения!
Покланяюся Тебе, Боже Отче, яко согрешающа мя не погубляеши со беззаконми моими, но долготерпиши, ожидая обращения моего!
Покланяюся Тебе, Боже Сыне, яко не хощеши смерти мене, грешнаго, но милосердно на покаяние мя призываеши!
Покланяюся Тебе, Боже Душе Святый, яко обращающася мя — не презиравши, припадающа — не отметаеши, но яко блуднаго сына приемлеши и обновлявши дух прав во утробе моей!
Покланяюся Тебе, Богу Отцу, очищающему вся беззакония моя!
Покланяюся Тебе, Богу Сыну, исцеляющему вся недуги моя!
Покланяюся Тебе, Богу Духу Святому, избавляющему от истления живот мой!
Покланяюся Тебе, Богу Отцу, не до конца прогневающемуся, ни вовек враждующему!
Покланяюся Тебе, Богу Сыну, не по беззакониям моим творящему ми!
Покланяюся Тебе, Богу Духу Святому, не по грехам моим воздающему мне!
Покланяюся Тебе, Богу Отцу, ущедряющему мя, якоже щедрит отец сыны!
Покланяюся Тебе, Богу Сыну, знающему страстное естество мое и слабость!
Покланяюся Тебе, Богу Духу Святому, врачующему немощи моя и очищающему мя от всякия скверны!
Покланяюся Тебе, Боже Отче, яко падшаго мя возставляеши!
Покланяюся Тебе, Боже Сыне, яко погибшаго мя взыскуеши!
Покланяются Тебе, Боже Душе Святый, яко мертваго мя оживляеши!
Покланяюся Тебе, Боже Отче милосерде, упование мое!
Покланяюся Тебе, Боже Сыне долготерпеливе, прибежище мое!
Покланяюся Тебе, Боже Душе Святый, незлобиве покровителю мой!
Сие, падши ниц, на земли глаголи:
Достойно есть яко воистинну покланятися, славословити и благодарите Тя, Троице Святая, Юже вся Небесныя Силы, Херувими, Серафими трисвятыми песнями восхваляют, вси святии благодарят, всякое создание раболепно покланяется, и аз, бренный червь ползящий, пред величеством неприступные славы Твоея бездерзновенен, в надежде милости Твоея дерзаю,безстудно припадаю и молю: даждь всегда Тебе, Создателю моему, неосужденно и неленостно кланятися, Тебе единаго знати, Тебе любити и боятися, Твоя повеления храните, Твоих заповедей путем ходите, Тебе хвалите и славите до последняго моего издыхания, да и по разлучении от бреннаго ми тела и паки с ним совокуплении, не лиши мя с угодившими Тебе радостне "Свят, Свят, Свят " восклицати во веки. Аминь.
(Из сочинений святителя Димитрия, митрополита Ростовского)
