Молитва о болящих
Тропарь, глас 4-й
Ско́рый в заступле́нии еди́н сый, Христе́, ско́рое свы́ше покажи́ посеще́ние стра́ждущему рабу Твоему, и изба́ви от неду́г и го́рьких боле́зней, и воздви́гни во е́же пе́ти Тя и сла́вити непреста́нно, моли́твами Богоро́дицы, еди́не Человеколю́бче.
Кондак, глас 2-й
На одре́ боле́зни лежа́щаго, и сме́ртною ра́ною уя́звленнаго, я́коже иногда́ воздви́гл еси́, Спа́се, Петро́ву те́щу, и разсла́бленнаго на одре́ носи́мого: си́це и ны́не, Милосе́рде, стра́ждущаго посети́ и исцели́: Ты бо еди́н еси́ неду́ги и боле́зни ро́да на́шего понесы́й, и вся моги́й я́ко Многоми́лостив.
Молитва
Влады́ко Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия, и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же наш, рабо́в Твои́х (имена) , немощству́ющих посети́ ми́лостию Твое́ю, прости́ им вся́кое согреше́ние во́льное и нево́льное. Ей, Го́споди, враче́бную Твою́ си́лу с Небесе́ низпосли́, прикосни́ся телеси́, угаси́ огне́вицу, укроти́ страсть и вся́кую не́мощь тая́щуюся; бу́ди врач рабо́в Твои́х (имена) , воздви́гни их от одра́ боле́зненнаго и от ло́жа озлобле́ния це́лых и всесоверше́нных, да́руй их Це́ркви Твое́й благоугожда́ющих и творя́щих во́лю Твою́. Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
